22. júní 2023 /
Utanríkisráðuneytið

Hannes Heimisson afhendir forseta Úkraínu trúnaðarbréf

Hannes Heimisson, sendiherra Íslands gagnvart Úkraínu, og Volodymyr Zelensky, forseti Úkraínu.
Hannes Heimisson, sendiherra Íslands gagnvart Úkraínu, og Volodymyr Zelensky, forseti Úkraínu.

Hannes Heimisson, sendiherra Íslands í Varsjá, afhenti í gær Volodymyr Zelensky, forseta Úkraínu, trúnaðarbréf sitt sem sendiherra Íslands gagnvart Úkraínu. Athöfnin fór fram við kirkju heilgrar Soffíu í Kænugarði. Að lokinni athöfn átti sendiherrann tvíhliða fund með forsetanum.

Hannes bar Úkraínuforseta kveðju íslenskra stjórnvalda og íslensku þjóðarinnar og lýsti aðdáun á hugrekki og þrótti Úkraínumanna gegn innrás Rússlands. Greindi hann einnig frá því að mikil samstaða væri á Íslandi um stuðning við Úkraínu.

„Ísland mun leggja sérstaka rækt við samskipti við Úkraínu á næstu árum, enda ljóst að mjög umfangsmikil verkefni eru framundan. Ísland mun áfram leita leiða til þess að styðja við Úkraínu í samræmi við þeirra þarfir og okkar getu. Það er gleðilegt að sendiherra okkar hafi afhent trúnaðarbréf og mikilvægt skref í þá átt að styrkja tengsl milli þjóðanna,“ segir Þórdís Kolbrún Reykfjörð Gylfadóttir utanríkisráðherra.

Hannes og Zelensky ræddu á fundi sínum um söguleg tengsl Íslands og Úkraínu og mikilvægi samstöðu með Úkraínu gagnvart innrásarstríði Rússlands. Þá greindi Hannes frá því að Ísland myndi leggja áherslu á að styrkja samskipti við Úkraínu á næstu árum og taka þátt í að styðja varnarbaráttu landsins og uppbyggingu. Hannes sagði að Ísland muni áfram styðja við Úkraínu með framlögum í tengslum við varnir landsins og mannúðarmál. Þessu til viðbótar sagði hann Ísland muni leggja áherslu á að styðja við málstað Úkraínu með pólitískum hætti ásamt því að efla viðskiptaleg og menningarleg tengsl milli landanna.

Í tilkynningu á vef úkraínskra stjórnvalda kemur fram að Zelensky hafi þakkað Íslandi fyrir stuðning við Úkraínu. Óskaði hann Íslandi til hamingju með formennsku í Evrópuráðinu og nýafstaðin leiðtogafund í Reykjavík. Í því samhengi tiltók hann sérstaklega stofnun tjónaskrárinnar sem er liður í að draga Rússland til ábyrgðar fyrir þann skaða sem innrás þeirra hefur valdið.

Ísland opnaði sendiráð í Póllandi á síðasta ári en auk Póllands eru Búlgaría, Rúmenía og Úkraína í umdæmi sendiráðsins. Áður var Úkraína á meðal umdæmisríkja sendiráðs Íslands í Helsinki. Nú þegar trúnaðarbréf hefur verið afhent getur Hannes formlega hafið störf sem sendiherra Íslands gagnvart Úkraínu.

Sendiherrar fjögurra annarra ríkja gagnvart Úkraínu afhentu trúnaðarbréf í sömu athöfn.

Var efnið hjálplegt?