21. maí 2025 /
Utanríkisráðuneytið

EES-ríkin efla samstarf á sviði utanríkis- og öryggismála

Espen Barth Eide utanríkisráðherra Noregs, Þorgerður Katrín Gunnarsdóttir utanríkisráðherra, Sabine Monauni utanríkisráðherra Liechtenstein og Kaja Kallas utanríkismálastjóri Evrópusambandsins.
Evrópusambandið
Espen Barth Eide utanríkisráðherra Noregs, Þorgerður Katrín Gunnarsdóttir utanríkisráðherra, Sabine Monauni utanríkisráðherra Liechtenstein og Kaja Kallas utanríkismálastjóri Evrópusambandsins.

EFTA-ríkin innan EES, Ísland, Noregur og Liechtenstein, og Evrópusambandið (ESB) ætla að efla samstarf sitt á sviði utanríkis- og öryggismála. Þorgerður Katrín Gunnarsdóttir, utanríkisráðherra undirritaði sameiginlega yfirlýsingu þess efnis í tengslum við fund EES-ráðsins sem fram fór í Brussel í dag. Þar er kveðið á um aukið pólitískt samráð, að ríkin samræmi afstöðu til alþjóðamála, efli samstarf sitt á sviði öryggis- og varnarmála og vinni saman að því að standa vörð um mannréttindi, þ.m.t. jafnrétti. 

„Við núverandi aðstæður á alþjóðavettvangi er mikilvægt að styrkja samstarfið við okkar helstu vina- og samstarfsþjóðir. Samstarf við Evrópusambandið um alþjóðamál hefur frá upphafi verið hluti af EES-samstarfinu og mikilvægt að efla það með þessum hætti“, segir Þorgerður Katrín Gunnarsdóttir, utanríkisráðherra.

Samkeppnisfærni, viðskipti og efnahagslegt öryggi voru í brennidepli á fundi EES-ráðsins í Brussel. Utanríkisráðherrar EFTA-ríkjanna þriggja áttu einnig pólitískt samráð við Kaju Kallas, utanríkismálastjóra ESB þar sem m.a. var rætt um stöðuna í Úkraínu, þá alvarlegu og hörmulegu stöðu sem við blasir á Gaza og málefni Norðurslóða.  

Í ávarpi sínu á EES-ráðsfundinum lagði Þorgerður Katrín áherslu á aukið mikilvægi efnahagslegs öryggis innan EES-samstarfsins og hlutverki þess þegar kemur að eflingu öryggis og viðnámsþróttar innan EES-ríkjanna. Áréttaði hún að viðskiptahindranir geti haft í för með sér alvarlegar afleiðingar fyrir efnahagslegt öryggi.    

Utanríkisráðherra fundar í fyrramálið með Maroš Šefčovič, framkvæmdastjóra utanríkisviðskipta og efnahagslegs öryggis í framkvæmdastjórn ESB sem einnig fer með málefni EES-samstarfsins, sem einnig tók þátt í fundi EES-ráðsins í dag.

EES-ráðið er pólitískur vettvangur EES-samstarfsins og fer fram tvisvar á ári. Þar hittast utanríkisráðherrar EFTA-ríkjanna innan EES auk fulltrúa framkvæmdastjórnar ESB sem og fulltrúa þess ríkis sem fer með formennsku í ráðherraráði ESB hverju sinni, en Pólland fer nú með formennsku í ráðinu. 

Var efnið hjálplegt?