20. ágúst 2026 /
Utanríkisráðuneytið

Varnaræfingunni Norður-Víkingur hleypt af stokkunum

Þorgerður Katrín Gunnarsdóttir, utanríkisráðherra, ásamt Matthew Whitaker, fastafulltrúa Bandaríkjanna gagnvart Atlantshafsbandalaginu, og Alexus Grynkewich (t.v.), yfirhershöfðingja Atlantshafsbandalagsins.
Þorgerður Katrín Gunnarsdóttir, utanríkisráðherra, ásamt Matthew Whitaker, fastafulltrúa Bandaríkjanna gagnvart Atlantshafsbandalaginu, og Alexus Grynkewich (t.v.), yfirhershöfðingja Atlantshafsbandalagsins.
Varnaræfingunni Norður-Víkingur var formlega hleypt af stokkunum á öryggissvæðinu á Keflavíkurflugvelli í vikunni að viðstöddum fjölmörgum innlendum og erlendum gestum. Þorgerður Katrín Gunnarsdóttir, utanríkisráðherra, og Alexus Grynkewich, yfirhershöfðingi Atlantshafsbandalagsins, sem  jafnframt er yfirmaður herafla Bandaríkjanna í Evrópu, fluttu ávörp á opnunarathöfninni. Matthew Whitaker, fastafulltrúi Bandaríkjanna gagnvart Atlantshafsbandalaginu, var einnig viðstaddur opnunarathöfnina.

„Varnarsamningurinn við Bandaríkin á 75 ára afmæli í ár og það er við hæfi að minnast þessara tímamóta með því að láta hendur standa fram úr ermum og sýna okkar nána samband í verki. Varnarsamningurinn hefur staðist tímans tönn vegna þess að hann hefur þróast til þess að mæta áskorunum hvers tíma. Norður-Víkingur er hluti af þeirri þróun,“ sagði Þorgerður Katrín í ávarpi sínu. „Æfingin fléttar saman meginstoðirnar tvær í vörnum Íslands; varnarsamninginn og aðildina að Atlantshafsbandalaginu. Hún sýnir fram á að skuldbindingar okkar gagnvart hvert öðru eru lifandi, enda byggjast þær á trausti, vináttu, sameiginlegum gildum og hagsmunum.“

Fastafulltrúi Bandaríkjanna gagnvart Atlantshafsbandalaginu, Matthew Whitaker, fundaði í heimsókn sinni til Íslands með Kristrúnu Frostadóttur forsætisráðherra og Þorgerði Katrínu Gunnarsdóttur utanríkisráðherra. Meðal umræðuefna voru málefni Atlantshafsbandalagsins, þróun mála á Norður-Atlantshafi og norðurslóðum og traust og náið samband Íslands og Bandaríkjanna, en í ár eru 75 ár liðin frá því að tvíhliða varnarsamningur ríkjanna var undirritaður. Einnig var rætt um stöðu mála í Úkraínu og stuðning við áframhaldandi varnarbaráttu. Whitaker heimsótti einnig íslensk fyrirtæki sem bjóða upp á tvínota tækni sem nýtist í öryggis- og varnarmálum.
Var efnið hjálplegt?